بارماق ائله مك!
سانجي آمانيني كسميشدي. بَلَن-بَلَن گئديردي. آتا قيزغين - قيزغين:
-سنه الينه گئچني قارنينا تيخما دئمه ديمي ؟! بارماقلا تؤك ائشيگه، يوخسا اؤله جكسن! – دئدي.
اوغول آتانين نه دئديگي ائشيتمه سه ده دونيانين او بيري اوجوندا ،
فوتبال مئيدانيندا ، بيري بونو ائشيتدي. بارماق ائله دي. بارماقدان ،
ايللر بويو اوتدورولان مؤهور – تسبئح ، موللا-مونبر ، دين – مذهب قو....
دولار قامو اويونون اوزونه...
رئيسيم
من نن اوقده ر آي باشي پول چيخدي رئيسيم
يئخسين ائوين آللاه ، ائويمي يئخدي رئيسيم
پرونده مه توبيخ قالادي حق سيز- حساب سيز
دائم ياپيشيب خيرخيرامي سيخدي رئيسيم
پاداشي خال اوغلانلارا يازدي بيزه آمما-
نوبت يئتيشنده ائله ويرنيخدي رئيسيم
دللك ليغه شايسته اولوب، تاپدي تخصص
ارباب رجوني چون بير عومور قيخدي رئيسيم
رشوه آلاراق فوري چوبان دويمه يي توتدي
ياخدي چوره گه چاي پولوني، تيخدي رئيسيم
گلدي كه ايكي ائششگين آرپاسيني بولسون
بير پاي دا نهايت اؤزونه چيخـــــدي رئيسيم!!
" پان" – لار دونياسي!
موللانصرالدين، بالانصرالدينين قولتوغونداكي كيتابي گؤستَره رك سوروشور: - توركجه كيتاب اوخويورسان؟! اولمايا سنده پان توركيست اولوبسان؟
- نه دخلي وار آتاجان ؟ باخين سيزده فارسجا قزئت* آليب سيز، بئله ايسه سيزده پان فارسيست سيز...
موللانصرالدين گولومسه يير:
-يوخ اوغول! من پان فارسيست دئييلم، قزئتي يالنيز شوشه لري سيلمك اوچون آلميشام.
*قزئت: روزنامه يا اونا موشابيح ؟
من ديلنچي دئييلم!
من ديلنچي دئييلم ، اوشاغيم خسته خانادادير ، پولوم يوخدو چيخاردام ،اولسا منه يارديم ائده سه نيز.
من ديلنچي دئييلم، پولوم قورتولوب يولدا قالميشام ، اولسا منه…
من ديلنچي دئييلم، آيليغيم دالييا دوشوب ، كيرايه ني وئرمه سم ائو يئيه سي اثاثلاريمي ائشيگه تؤكه جك ، اولسا منه …
به مناسبت 21 فوريه روز جهاني زبان مادري
ايسفندين ايكيسي(فورينين ايرمي بيري) ياخينلانشير و بالانصر الدين فيكيره جومور ندن جومور؟
بالانصرالدين گؤزلريني الينده كي كيتابا زيلله يه رك قيوريليب آچيليردي .
بؤيرو اوسته ييخيليردي. آياقلاريني ديوارا داياييب كوفولداييردي. اوزو
قويلو دوشونجه يه داليردي؛ چومبلن اوتوروب گوجَنيردي؛ هردنسه ده دونبالاق
دوروردو. بو احوالاتي گؤزدن گئچيرن موللانصرالدين سونوندا اؤزونو
ساخلاماييب ديللندي: - " اوغول ! نه قيوريليب آچيليرسان ؟ اولمايا يومورتان ترسه گليب ؟وئر گؤروم او ميراتي، نمنه دي اوخويورسان ؟"
بالانصرالدين كيتابي آتاسينا
اوزاداراق، " آنا ياسادير . 15 نجي ماده سيني اوخويوردوم . آنجاق نه قدر
زور وئرديم اوندان بير شئي باش چيخاردا بيلمه ديم. سيزكي " تاريخ نادر "
كيتابيني يارييا قدر اوخوموشسونوز باخين گؤرون بو ماده نين آنلامي ندير؟
گؤره سن بيز سونوندا اؤز آنا ديلميز؛ توركجه ده درس اوخوياجاغيق يا يوخ؟ "
دئدي.
موللا دوداق آلتي ميزيلدادي:
" اصل 15 : زبان و خط رسمي و
مشترك مردم ايران فارسي است . اسناد و مكاتبات و متون رسمي و كتب درسي
بايد با اين زبان و خط باشد ولي استفاده از زبانهاي محلي و قومي در
مطبوعات و رسانه هاي گروهي و تدريس ادبيات آنها در مدارس ، در كنار زبان
فارسي آزاد است ."
بالانصرالدين موللاني دالغين گؤردوكده ايگنه لي - ايگنه لي :
-" هه نئجه اولدو !؟ ماده ني خيردالايا بيلدينيزمي؟ نه دئيير ؟ اولمايا سيزده قيرپاچ ائتدينيز؟ "
موللا كيتابي بوكوب يئره قويدو . گؤزلوگونو چيخارديب شوشه لريني منديلي ايله سيله رك دئدي :
-"اوغول ! بو ماده ده باش چيخارتيلماياجاق نه وار كي ! هر شئي آپ آچيق آيدين دير . آناياسادا دئييليركي :
" تورك ديلينده مدرسه اولمالي دير تورك لره
شايدد ه
تورك ديلينده مدرسه اولمالي هئچ كسه ! "
